أحمد شعيب

قالوا غبت يا شعيب سبع ثمان سنين         إسمك بجو الشعر مـا عاد لو رنيــن
جاوبتهم والقلب عم يخفق حنيـــــــن         بقصة غيابـــي لا تكونــــوا ظالميــن 
بغيبــــة خليل الشعر كثروا اللامعيــن         وسامع بناس بحالهم مش سامعين
ولولا انا غيب ويطـــــــول الغيــــــــاب          ما في طليع ولا حدى من الطالعيـن 

طليع حمدان
طلعة طليع اللي الفجــر منها أقتدى          بتتوحـم عليها مشـــاعيل الهـــدى
ولما جنابك عا حِمــى الغربه أهتدى          عا غيبتك لبنــــان ما ضيَّــــع صدى
ولما برجوعك البلبل الشـادي شدى          لقينـــاك يـــابس لا زهــور ولا ندى
وبالرغم مــا رجعت بسلامه ع البلاد           بتنعدّ بعدك غايب ومــــا في حدى

أحمد شعيب
يا ناكر زهوري وشـــذى معروفهـــا           ورهجة قوافي در صافي حروفهــــــا
لا تزيحنا بطلعه غريبـــه ظروفهــــا           وقبل الحكي عن سترها ومكشوفها 
أسال الجماهيـــر وزقيف كفوفهـــا           وشعّارنــــــا   وقلامهـــا   ودفوفهــــا

غيابي غياب الشمس ورجوعي كمان      رجوع الشمس ع شرط إنت تشوفها

طليع حمدان
بيعد بأفكارك معـــــي يـــا عندليب           حتى بروجعك عطــر عجناحـك تجيب
شمس الوجود من الدني لما تغيب      بترسم عشاطئ البحر مبسمها الكئيـب
وإنت يا شمس الدلع وال "ميني جيب"     زهق ربي من  شــــروقك والمغيــب
كل ما طلع تـا شوفك بالسمـــــــا             ما بشـوفك غيــر عالشاطئ القريب

احمد شعيب
بهنيك يا معود لســانك عالهجـــا            بال"ميني جيب" بيخجلو حروف الهجا
دوخ عيونك بالمواهب والحجـــــا             نور العقل بشيب عيــــــون الدجـــــــا
لما لقيت البعد مـــــا منو رجــــا             عاد الطموح لأقرب مسافـــه التجـــــا
وفضلت حالي ضل عالشاطئ قريـب       تا كون همزة وصل وسفينـة نجــــــــا

طليع حمدان
بين البعد والقرب يا أصحاب العقول           شوفوا الطريقو طلوع والدربـــــو نزول
همزة وصل عــن حالك بتقدر تقول           وبيناتنــــا والمجد ممنــوع الوصــــول 
ان كنّك سفينــة نجا بهالبحر جول            أبعد  مع  الموجــات وتحـدى الفصول
لكن إذا بتضل عالشاطئ الأميــن             بيلقبوك الناس بسفينــــــة خمـــول

أحمد شعيب
النحلــه قدر ما غيّرت عدانهــــــا                 بتعود ترجع للقفيــــر ال صـــانهـا
والسفينة المشيت والله عانهـــا                 عم تنقل الغيــــــاب عا  أوطانهــا
وفي إم لوعها الزمـــان وخانهـــا                 وهجـر الأبن فجــر بحـــر أحزانهــا 
وضلت حزينه وباكيه طول الحيـاة                تا عاد ليهــا وأرتمى بأحضـــانهــا

طليع حمدان
قرب الحنونه غصن والطفله ثمـر                 وبعد المربي شاهد وعبا الكمــر
ويا مأمن بريشـــه قريبـه للوتـــر                 أبعد لا تقرب صـار قربك محتقـــر
وحتى تصير تأمــن ببعد النظـــر                  من بعد هاك العز وليالي السمر
شوف القمر بالجو صغرت قيمتو                  بوصول "أبولو" على سطح القمر

 
احمد شعيب
عقد ماتشوف البعد غامض رهيب             ما في طريق بعيد عالواعي اللبيب
يللي قصد تيكشف السر الرهيب               يمكن يصيب بنظرتــو يمكن يخيب
خذلك بيــان عليك وعليي قريب                 وعا كل قلب ملوع ومــا لو طبيـب
بعد الحبيب ولوع ودمـــوع وشقا              أحلى سعاده بهالدني قرب الحبيب

طليع حمدان
إبعدلي حبيبي بعيد عني منزلـو                حتى يضلو خيــــوط قلبــي يغزلو
وان كنت سـر العاشقين بتجهلو                مـن واجباتك للمجترب تسألــــــو
لما الحبيب يشنكلك وتشنكلـــو                بتبيعدو المشـوار حتى تطولــــــو
كل ما حبيبك يبعدك عن منزلـــو                كل مـا بصدرك هتف قلبك إلــــــو
وبتصير لو شفت البلابل ترغلــوا                تصرخ حبيبي مبسمك مــا أجملو
ولما العسل بظل عثمك قريـــب                بتمــوت فيك ال قابليـــــه  للحلـو

أحمد شعيب
ظنيت رح يطلع طليع بشي جديد               تاري جديدو مثـل رحمه ع الفقيد
ال بيحب وبيعشق عطرزك من بعيد             رح يطلع معثر بحبــو شئ أكيـــد